ენის გასატეხი
***
 მწიფე ზღმარტლი დაზღმარტლული
ხიდან მოსწყდა ზამთარში,
ზღმარტლმა ზღარბის სოროს ზღუბლთან
მოადინა ზღართანი.
***
წიფლის ძირას ამოსულა
წიფლიო და წიფლის სოკო,
მისდგომია წიფლისჩიტა,
წიფლისჩიტას სოკო მოსწონს,
სოკო რომ გამოელია,
მიუბრუნდა წიწიბოსო.
***
თოვლაობას თამაშობენ
თოვლია და სათოვლია,
სათოვლიას თეთრი ქუდი
უკვე გადასათოვლია.
***
კონა-კონა კორჩიოტას
კრეფენ სკვინჩა და ბეღურა,
მწვანე კორდი კორჩიოტით
გადაკორჩიოტებულა.
***
კრუტუნებენ კნუტები,
კრუშკრუშებენ კრუხები,
კესომ კიკნა ტიკინა
დააყენა კუთხეში.
***
კოჭაობას კოჭებით
თამაშობენ გოჭები,
კოჭი მოხვდათ კოჭებში,
წაკინჭილდნენ კოჭლობით.
***
ერთმა კუდა მაკრატელმა
კოპლებიან კაბაზედა
კანტები და ნაკეცები
ჩააგვირისტმაკრატელა.
***
ფია, ფია, ფიფიაო,
ფთილასავით ფინიაო,
მისდგომია ფისოს ფაფას,
თქლაფა-თქლუფით მოუთქლაფავს.
***
_რერო, რერო, _ მღერის რეზო,
ლელა უკრავს როიალსო,
ვერ გაიგო, ლელამ რეზოს
კონცერტზე რა როლი აქვსო.
© ლელა ცუცქირიძე
| 
ენის გასატეხი
