პედიატრები ჩვილის ცხოვრების პირველ წელიწადს  რომ მეოთხედებად ყოფენ, შემთხვევითი სულაც არაა. ყოველ სამ თვეში ბავშვის ორგანიზმი განვითარების მორიგ საფეხურს გადალახავს. თუკი  პირველ ორ მეოთხედში ეს მეტნაკლებად მდორედ მიედინება, მესამეს ბოლოსკენ ხარისხობრივი ნახტომი აღინიშნება. ჩვენი პატარა სულ უფრო აქტიური ხდება - ახლა ხომ მას თვალს ვერ მოაშორებ. უკვე მეცხრე თვიდან გარკვეული სირთულეები იჩენს თავს გასეირნებისას. ბავშვს ჯერ არ შეუძლია სიარული, მაგრამ დიდხანს ეტლში წოლაც აღარ მოსწონს. და არც არის საჭირო: იმიტომ რომ გარეთ მას უკვე არა მარტო სძინავს, არამედ ფხიზლადაც ადევნებს თვალს გარშემო რა ხდება. თუმცა, როცა ზის, ცნობისმოყვარე და მოუსვენარი პატარა, შიძლება უცებ გადაიხაროს და ადვილად გადმოვარდეს. გვახსოვდეს, რომ ამ ასაკში ეს ერთერთი ხშირი ტრავმაა. მე ჩემს პატარას, რასაც ჰქვია, ჰაერში ვიჭერდი, ძალიან აქტიური იყო ამ ასაკში, განსაკუთრებით სეირნობის დროს. ფეხებს ისე იქნევდა, რომ ეტლიდან ადვილად სრიალდებოდა.  ისე, სპეციალისტები იმასაც ამბობენ, რომ ბავშვოსთვის არაა სასურველი დიდხანს ეტლში ჯდომა. ის ხომ მოხრილი ზის, ჰოდა ეს თურმე არღვევს სწორად ხერხემლის ჩამოყალიბებას და ართულებს სისხლის მიმოქცევასა და სუნთქვას. სასეირნო ეტლით მოსახერხებელია ბავშვის გაყვანა პარკში თუ სკვერში. იქ კი ამოვიყვანთ, ხელში გავასეირნებთ ან დავსვამთ, ისე რომ ეტლს დაეყრდნოს და სხვა. მესამე მეოთხედის ბოლოს ხომ ბავშვების უმეტესობას უკვე შეუძლია დგომა და ნაბიჯის გადაგმაც. ისე, ერთის მხრივ, ეს თითქოს ბუნებრივია, მაგრამ ბავშვისთვის უმნიშვნელოვანესი მიღწევაა ფსიქომოტორულ განვითარებაში. და თუკი ჩვილი ჯერ ვერ დგება და ვერც ჯდება დამოუკიდებლად? მერვე თვეში, სხვა დამაკმაყოფილებელ მაჩვენებლებთან ერთად, ეს ჯერ კიდევ დასაშვებია - აიხსნება ბავშვის ინდივიდუალური თავისებურებებით ან უსიამოვნო გარემოებით, ვთქვათ, ცოტა ხნის წინ გადატანილი გაციებით. მაგრამ თუ პატარა არ დაჯდება თვითონ მეცხრე თვის ბოლოს, აღარ ღირს ლოდინი - მივმართოთ ექიმს. ამგვარი ჩამორჩენის ყველაზე ხშირი მიზეზი ნევროლოგიური დარღვევებია. და როგორც წესი, ჯერ კიდევ მუცლადყოფნის პერიოდში ან დაბადების მომენტში ჩნდება. გამორიცხული არ არის, რომ პირველად სწორედ ახლა გამოვლინდა. ბოლო თვეებში ხომ ინტენსიურმა განვითარებამ ზედმეტი დატვირთვა შექმნა ბავშვის ნერვულ სისტემაზე და ამ სახით გამოვლინდა.